Türk dövlətində sabiq prezidentin oğlu hakimiyyəti ələ keçirmək istəyib: Bu cəza verildi - FOTO

Qırğızıstanın sabiq prezidenti Almazbek Atambayevin oğlu, sosial-demokratların lideri Kadır Atambayev hakimiyyətin zorla ələ keçirilməsinə hazırlıq işi üzrə 4 il müddətinə azadlıqdan məhrum edilib.

Publika.az xəbər verir ki, bu barədə “AKİpress” məlumat yayıb.

Bildirilib ki, məhkəmə Kadır Atambayevi Qırğızıstan Cinayət Məcəlləsinin 326-cı maddəsi (“Hakimiyyətin zorla ələ keçirilməsi”) ilə təqsirli bilib.

Həmçinin iş üzrə təqsirləndirilən şəxs, partiyanın digər lideri Temirlan Sultanbekov isə 7 il müddətinə həbs cəzasına məhkum edilib. Məhkəmə onun əmlakının müsadirə olunmasına da qərar verib.

İstintaqın məlumatına görə, təqsirləndirilən şəxslər parlament seçkilərindən sonra kütləvi iğtişaşlar təşkil etməyə hazırlaşıblar. Daxili İşlər Nazirliyinin məlumatına əsasən, qrupa siyasətçilər, sabiq deputatlar, keçmiş dövlət qulluqçuları və hüquq-mühafizə orqanlarının əməkdaşları daxil olub. Onların tərəfdarları, o cümlədən mütəşəkkil cinayət qruplarının və idman icmalarının nümayəndələrini cəlb etdikləri bildirilir.

İş üzrə şübhəlilər arasında Sultanbekovun sürücüsü Ermek Ermatov və Dövlət Mühafizə Xidmətinin sabiq rəhbəri Damir Musakeyevi də var.

2026-cı ilin yanvarında digər təqsirləndirilən şəxslər Atazov və Kadırov ev dustaqlığına buraxılıb. İyul ayında isə Musakeyev ölkədən çıxmamaq barədə iltizamla azadlığa buraxılıb.

Müəllif: Adəm