İsrailin maliyyə naziri bu planı təqdim etdi: Ərdoğanın səlahiyyət müddəti bitənə qədər...

İsrail Türkiyə prezidenti Rəcəb Tayyib Ərdoğanın səlahiyyət müddəti bitənə qədər Türkiyədən gələn bütün mallara 100% rüsum tətbiq etmək niyyətindədir.

Publika.az xəbər verir ki, bu barədə Yəhudi dövlətinin maliyyə naziri Bezalel Smotriç bildirib.

“Ərdoğanın səlahiyyət müddətinin sonuna qədər Türkiyədən idxala 100% rüsum. Türkiyədən idxala tariflərin artırılması sionistlərin Ərdoğana uyğun cavabıdır”, - o, “X” səhifəsində yazıb.

Smotriç Türkiyə liderinin Fələstinin radikal HƏMAS hərəkatını müdafiə etməkdə “ön sıralarda” olduğuna əminliyini ifadə edib və Ankaranın əvvəllər İsraillə bütün ticarəti dayandırmaq qərarına gəldiyini xatırladıb. “Ərdoğanın İsrailə tədarükün dayandırılması ilə bağlı bəyanatı iqtisadi boykot elanıdır və Türkiyənin qoşulduğu beynəlxalq ticarət müqavilələrinin ciddi şəkildə pozulmasıdır”, - deyə nazir bildirib.

Həddindən artıq sağçı Dini Sionizm partiyasına rəhbərlik edən siyasətçi əlavə edib ki, o, İsrailin “çox uzun illərdir ki, Ərdoğanın antisemitizmi ilə mübarizə apardığına” inanır. “Bizim namusumuz, milli qürurumuz və əlbəttə ki, onunla mübarizə aparanların dəstəyinə ehtiyacı olmayan güclü iqtisadiyyatımız var. Ərdoğanın səlahiyyət müddətinin sonunda Türkiyə vətəndaşları sağlam düşüncəli və İsrailə nifrət etməyən bir lider seçsələr, Türkiyə ilə tam ticarətə qayıtmaq mümkün olacaq”, - Smotriç qeyd edib.

Eyni zamanda, o, İsrailin idxalı diversifikasiya etməli və Türkiyədən tədarükləri əvəz etməli olacağını göstərib. O, alternativ istiqamətlər kimi Çin, Şərqi Avropa ölkələri, Almaniya və Kipri ​​qeyd edib.

“The Jerusalem Post” qəzetinin yazdığına görə, Smotriç artıq Türkiyə mallarına rüsumların artırılması planını İsrail Nazirlər Kabinetinin müzakirəsinə təqdim edib. Bu, digər şeylərlə yanaşı, iki ölkə arasında 1996-cı ildə imzalanmış azad ticarət sazişinin pozulmasını nəzərdə tutur.

Tural