Məxfi sənədlər sızdı: İsrail İrana hücumu təxirə saldı - Strategiya dəyişdi

İsrail Amerikanın məxfi sənədlərinin sızması səbəbindən İrana hücumunu təxirə salıb və strategiyasını dəyişir.

Publika.az xəbər verir ki, bu barədə “Times” məlumat yayıb.

İsrailin hərəkətləri barədə məlumatı adı açıqlanmayan bir ölkədən olan kəşfiyyat mənbəsi verib və bildirib ki, "Amerika sənədlərinin sızması, müəyyən strategiyaların və komponentlərin dəyişdirilməsi zərurəti səbəbindən hücum gecikdi. İntiqam olacaq, lakin bu, gözləniləndən daha uzun çəkəcək".

CNN daha əvvəl bildirmişdi ki, Birləşmiş Ştatlar İsrailin İrana zərbə endirməyə hazırlığına dair çox məxfi kəşfiyyat məlumatlarının sızmasını araşdırır. Oktyabrın 15-i və 16-na aid sənədlər oktyabrın 18-dən onlayn yayılmağa başlayıb.

CNN-ə görə, onlar "tam məxfi" olaraq qeyd olunur və bu məlumatlara yalnız ABŞ-dan əlavə, Kanada, Yeni Zelandiya və "Beşgözlü" kəşfiyyat alyansının üzvlərinin çıxışı var.

Pentaqonun rəhbəri Lloyd Ostin deyib ki, onun katibliyindən heç kim İsrailin İrana hücuma hazırlığı ilə bağlı Amerika kəşfiyyatının sızması ilə bağlı araşdırmada iştirak etmir.

Qeyd edək ki, oktyabrın 1-də İran tarixdə ikinci dəfə İsraili kütləvi raket atəşinə məruz qoyub və bunu özünümüdafiə aktı adlandırıb. İsrail ordusu 180-ə yaxın ballistik raketin atıldığını və onların əksəriyyətinin ələ keçirildiyini bildirib.

Adəm