Netanyahu İran xalqına ÇAĞIRIŞ ETDİ: "Xamenei rejimini daha çox qorxudan bir şey var"

İsrailin baş naziri Benyamin Netanyahu İran xalqına yeni videomüraciət ünvanlayıb.

Publika.az xəbər verir ki, İsrail hökumətinin başçısının bəyanatları onun ofisi tərəfindən yayımlanıb.

O, ölkəsinin İranla müharibə istəmədiyini və dövlətlər arasındakı münasibətlərdəki bütün problemlərin Tehrandakı hakimiyyətdən qaynaqlandığını bildirib.

"İranın ali dini lideri Ayətullah Əli Xamenei rejimini İsraildən daha çox qorxudan bir şey var. Bu, siz İran xalqısınız", - Netanyahu deyib.

İsrail hökumətinin başçısı əlavə edib ki, Xamneyi rejimi hər gün zəifləyir, İsrail isə güclənir və dünya əvvəllər gücünün yalnız bir hissəsini görüb.

İsrailin baş naziri vurğulayıb ki, İranın oktyabrın 1-də İsrailə təşkil etdiyi raket hücumu Tehrana 2,3 milyard dollara başa gəlib. Netanyahunun sözlərinə görə, İsrailə qarşı növbəti hücum İran iqtisadiyyatına böyük ziyan vuracaq.

“Mən bilirəm ki, çoxlarınız bu müharibəni istəmirsiniz. Mən də bu müharibəni istəmirəm. İsrail xalqı bu müharibəni istəmir”, - Netanyahu iranlılara müraciətində əlavə edib.

Çıxışını yekunlaşdıran Netanyahu İranı İsraillə dinc və firavan həyat “xəyalını” gerçəkləşdirməyə çağırıb.

Noyabrın 5-də İsrail Müdafiə Qüvvələri İranın mümkün zərbəsi ərəfəsində hazırlıq səviyyəsini artırıb. Ordu Baş Qərargahı və bütün bölmələr vəziyyəti qiymətləndirmək üçün hər gün iclaslar keçirir, aviasiya və hava hücumundan müdafiə sistemləri yüksək hazırlıq vəziyyətindədir.

Hüseyn İbadlı