ABŞ və İsrailə qələbə elan edib savaşı bitirək - Zərifin sensasion planı

İranın keçmiş xarici işlər naziri və ölkənin Qərblə nüvə danışıqlarında illərlə əsas fiqur olmuş Cavad Zərif rəsmi Tehrana sensasiyalı çağırış edib.

Publika.az xəbər verir ki, ABŞ-ın "Foreign Affairs" nəşrində geniş məqalə ilə çıxış edən Zərif, İranın həm ABŞ, həm də İsrail ilə mövcud münaqişəni öz xeyrinə bitirməli olduğunu bəyan edib.

Zərifin təklif etdiyi strateji gediş İranın beynəlxalq təcriddən çıxması üçün radikal addımları ehtiva edir. Keçmiş nazir hesab edir ki, Tehran indi "qələbə elan etməli" və həm cari savaşı dayandıracaq, həm də gələcək qarşıdurmaların qarşısını alacaq bir saziş imzalamalıdır.

Onun təqdim etdiyi planın əsas elementlərinə görə, İran nüvə proqramını məhdudlaşdırmağa və Hörmüz boğazını yenidən dünya ticarəti üçün tam açmağa razı olmalıdır. Bunun müqabilində isə Vaşinqtondan bütün sanksiyaların tamamilə ləğvi tələb edilməlidir.

Bundan əlavə, Zərif Tehran və Vaşinqton arasında qarşılıqlı "hücum etməmək haqqında pakt" imzalanmasını zəruri hesab edir. Bu razılaşma çərçivəsində hər iki ölkə gələcəkdə bir-birinə zərbə endirməyəcəyinə dair rəsmi öhdəlik götürməlidir. Keçmiş nazir, həmçinin ABŞ-la iqtisadi əməkdaşlıq təklifini də irəli sürüb və bunun hər iki xalq üçün faydalı olacağını vurğulayıb.

Cavad Zərif qeyd edib ki, bütün bu tədbirlər İran hakimiyyətinə diqqəti xarici təhdidlərdən müdafiəyə deyil, daxili problemlərə və vətəndaşların həyat səviyyəsinin yüksəldilməsinə yönəltməyə imkan verəcək.

Onun sözlərinə görə, məhz bu yol İran xalqının layiq olduğu parlaq gələcəyi təmin edə biləcək yeganə çıxış yoludur.

Müəllif: Adəm