Sülh cəmi 4 gün çəkdi - Livan sərhədində yenidən raketlər işə düşdü

Livanın şiə "Hizbullah" qruplaşması ölkənin cənubunda İsrail əsgərlərini atəşə tutaraq atəşkəs rejimini pozub.

Publika.az xəbər verir ki, bu barədə İsrail Müdafiə Qüvvələri (İDF) öz "Telegram" kanalında məlumat yayıb.

Məlumata görə, çərşənbə axşamı "Hizbullah" Livanın cənubundakı Rab-Talatin rayonunda İsrail mövqelərinə bir neçə raket zərbəsi endirib. Cavab olaraq İsrail qoşunları raketlərin atıldığı qurğunu dərhal məhv edib.

Bundan əlavə, İDF-nin bəyanatında deyilir:

"İlkin məlumatların əksinə olaraq, araşdırmalar göstərir ki, Kfar-Yuval və Maayan-Barux rayonlarında həyəcan siqnalları Livandan İsrail ərazisinə doğru buraxılan dronun zərərsizləşdirilməsi səbəbindən işə düşüb. Bu hücumlar atəşkəs razılaşmasının aşkar şəkildə pozulmasıdır".

Xatırladaq ki, aprelin 14-də İsrail və Livan arasında birbaşa danışıqların ilk raundu baş tutub. Nəticədə aprelin 17-dən qüvvəyə minən 10 günlük atəşkəs razılaşması əldə olunub. Danışıqların növbəti mərhələsi isə aprelin 23-də Vaşinqtonda keçirilməlidir.

Hüseyn İbadlı