Trampın planı alt-üst oldu: Şahzadə ona "yox" dedi

ABŞ prezidenti Donald Trampın Hörmüz boğazında ticarət gəmilərinin müşayiət olunması ilə bağlı başlatdığı “Azadlıq layihəsi” (Project Freedom) Vaşinqtonla Ər-Riyad arasında gərginliyə səbəb olub.

Publika.az xəbər verir ki, bu barədə “The New York Times” (NYT) qəzeti mənbələrə istinadən məlumat yayıb.

Nəşrin iddiasına görə, Trampın bazar günü ABŞ hərbçilərinin Hörmüz boğazında gəmiləri müşayiət edəcəyi barədə bəyanatı Səudiyyə Ərəbistanının vəliəhd şahzadəsi Məhəmməd bin Salmanı hiddətləndirib. Cavab addımı olaraq, şahzadə ABŞ-ın Səudiyyə hava məkanından istifadəsinə və ölkədəki Amerika bazalarına girişinə qadağa qoyub.

Pentaqonun adının açıqlanmasını istəməyən rəsmisi bildirib ki, bin Salmanın bu qətiyyətli gedişi Vaşinqtonu “dondurub” və Trampı planlarından geri çəkilməyə məcbur edib. Hazırda Səudiyyə Ərəbistanı hava məkanı və bazalarla bağlı məhdudiyyətləri qaldırsa da, Hörmüz əməliyyatı üçün öz ərazisindən istifadəyə hələ də icazə verməyib.

Xatırladaq ki, mayın 6-da Donald Tramp İranla danışıqlar başa çatana qədər gəmilərin Hörmüz boğazından keçirilməsi missiyasının müvəqqəti dayandırıldığını elan edib.

Müəllif: Adəm