İsrailin müdafiə naziri İranı HƏDƏLƏDİ

İsrailin müdafiə naziri İsrail Kats İsrail və Livan arasında dünən imzalanmış "tarixi" sazişi qiymətləndirərək bildirib ki, bu, "onilliklər ərzində ilk dəfə olaraq şimal sərhədi boyunca və Livanda yeni və daha təhlükəsiz reallıq formalaşdıra bilər".

Publika.az xəbər verir ki, bu barədə "The Times of Israel" məlumat yayıb.

Onun sözlərinə görə, İsrail Müdafiə Ordusu (İDF) daha əvvəl vəd etdiyi kimi Livandan tamamilə çıxmayacaq və hərbçilər öz təhlükəsizlik zonalarını, o cümlədən Bofor qalası dağ silsiləsi bölgəsini qoruyub saxlayacaqlar.

"Sınaq sazişin icrası olacaq, hələ qarşıda bir çox çağırışlar var", - deyən Kats əlavə edib ki, o, hərbçilərə "təhlükəsizlik zonasında uzunmüddətli mövcudluğa hazırlaşmağı və İDF əsgərlərini qorumaq, eləcə də şimaldakı yaşayış məntəqələri üçün təhdidləri aradan qaldırmaq üçün zəruri tədbirlər görməyi" tapşırıb.

O qeyd edib ki, sazişdə təsbit edilmiş vacib prinsip ondan ibarətdir ki, "Hizbullah" terror təşkilatı Livanın bütün ərazisində tam tərksilah olunana qədər heç bir çıxarılma olmayacaq.

Katsın sözlərinə görə, saziş eyni zamanda İran oxuna vurulmuş strateji zərbədir.

"İran təhdidlər və ABŞ-a təzyiqlər vasitəsilə İsraili qoşunları Livandan çıxarmağa məcbur etməyə çalışdı, lakin uğursuz oldu", - deyə İsrailin müdafiə naziri bildirib.

O, həmçinin Tehranı xəbərdar edərək bəyan edib ki, "əgər İran sazişin icrasına mane olmaq üçün İsrailə hücum etməyə çalışsa, Təl-Əviv ona qarşı böyük qüvvə ilə hərəkət edəcək.