ABŞ-ın Küveyt və Bəhreyndəki hərbi bazaları vuruldu

İslam İnqilabı Keşikçiləri Korpusu (SEPAH) ABŞ-nin Küveyt və Bəhreyndəki hərbi bazalarına kütləvi raket və dron zərbələri endirib.

Publika.az xəbər verir ki, bu barədə SEPAH-ın İctimaiyyətlə Əlaqələr Ofisi rəsmi bəyanat yayıb.

Məlumata görə, hərbi əməliyyat zamanı Küveytdəki "Əli Əl-Salem" aviabazası və Bəhreynin Salman limanında yerləşən ABŞ-nin 5-ci Donanmasına məxsus 8 mühüm obyekt ballistik raketlər və PUA-larla hədəfə alınaraq məhv edilib. SEPAH bu addımı ABŞ-nin İranın cənub sahillərinə etdiyi son hücumlara qətiyyətli cavab adlandırıb: "Təcavüzkar düşmən bu günün ilk saatlarında SEPAH-ın qayda pozan gəmiyə qarşı qanuni addımlarını bəhanə edərək İslam Respublikasının 5 sahil postuna hücum edib".

"İslamabad Anlaşma Memorandumuna əsasən, Hörmüz boğazında gəmilərin hərəkətinin tənzimlənməsi İrana məxsusdur. Bundan sonra qaydaları pozan gəmilərə qarşı daha sərt tədbirlər görüləcək. Atəşkəsin pozulması sənədin birinci bəndinin pozulması deməkdir və bütün proseslərin tamamilə dayandırılmasına səbəb olacaq" — bəyanatda qeyd edilib.