Azərbaycanla İordaniya arasında birbaşa aviareys açılacaq
Bizi izləyin

Nəqliyyat

Azərbaycanla İordaniya arasında birbaşa aviareys açılacaq

Bu gün “Azərbaycan Hava Yolları” QSC-nin (AZAL) prezidenti Cahangir Əsgərov İordaniyanın ölkəmizdəki səfiri Sami Asem Ğoşehlə görüşüb.

Bu barədə Publika.az-a AZAL-dan məlumat verilib.

Məlumata görə, görüş İordaniya kralı II Abdullah ibn Əl-Hüseynin dekabrın 10-da Azərbaycana rəsmi səfərinin yekunları əsasında baş tutub. Səfər çərçivəsində Prezident İlham Əliyev AZAL-ın rəhbərliyinə iki ölkə arasında birbaşa hava əlaqəsinin qurulması barədə tapşırıq verib.

C.Əsgərov və S.A.Ğoşeh bütün prosedur məsələləri başa çatdırıldıqdan sonra Bakı ilə Əmman arasında uçuşların 2020-ci ilin may ayının sonundan etibarən həyata keçiriləcəyi barədə razılıq əldə ediblər. Reyslər həftədə iki dəfə “Buta Airways” aviaşirkətinin “Embraer 190” təyyarələri ilə yerinə yetiriləcək.

Danışıqlar zamanı C.Əsgərov qeyd edib ki, birbaşa hava əlaqəsinin qurulması iki ölkə arasında turizmin və işgüzar əlaqələrin inkişafı üçün əlavə stimul olacaq. S.A.Ğoşeh yeni reysin hər iki ölkə vətəndaşları arasında böyük marağa səbəb olacağına inandığını bildirib.

Onun sözlərinə görə, yaxın gələcəkdə İordaniyanın ən böyük turizm şirkətləri ilə danışıqlar aparılacaq və həmin şirkətlərin nümayəndələri Bakıya işgüzar səfər edəcəklər.

Oxumağa davam et
Reklam
Reklam

Gündəm