Bu tədbir başlanğıcdır - Elçin Mirzəbəyli

Azərbaycan-BMT münasibətlərinin 30 illiyi ilə bağlı tədbirin Şuşa şəhərində keçirilməsi əlamətdar hadisədir. Bu mühüm tədbirdə Azərbaycanın yüksək hökumət nümayəndələri ilə yanaşı, BMT təmsilçiləri də yer alacaq. Bunu həm də faktiki olaraq BMT-nin Azərbaycanın ərazi bütövlüyünə verdiyi dəstək kimi qiymətləndirmək olar.

Publika.az xəbər verir ki, bu sözləri politoloq Elçin Mirzəbəyli deyib.

Politoloq qeyd edib ki, görüşün Şuşada təşkil olunması BMT kimi dünyanın ən nüfuzlu qurumunun mahiyyət etibarilə regionda Azərbaycanın yaratdığı reallıqları qəbul etdiyini və bu reallıqların ədalət prinsipinə söykənərək keçirildiyini bir daha təsdiq edir: "Verilən mesajlar Azərbaycanla BMT arasındakı münasibətlərin bundan sonra da inkişaf edəcəyini göstərir. Mühüm şərtlərdən biri də ondan ibarətdir ki, Azərbaycan həm 10 noyabr bəyannaməsinin prinsiplərinə uyğun olaraq, həm də bütövlükdə reallıqları əsas götürərək azərbaycanlı məcburi köçkünlərin istisnasız öz doğma yurdlarına qayıtması prosesində yaxından iştirak edəcək. Qurumun qaçqınlarla iş komissiyası bu prosesdə aktiv yer alacaq. Bu baxımdan da işğaldan azad edilən torpaqlarımızda BMT-nin də görəcəyi və Azərbaycanla birlikdə həyata keçirəcəyi çoxsaylı tədbirlər var və bu tədbir hələ ki, başlanğıcdır".