Ayaz Mütəllibov məni çağırıb dedi ki... - DEPUTAT

"Ayaz Mütəllibov Vətənini, millətini kifayət qədər sevən bir insan idi. Mən bunu Ayaz Mütəllibovu uzun müddət yaxından tanıyan şəxs kimi deyirəm. Allah ona rəhmət eləsin".

Publika.az">Publika.az-ın əməkdaşının verdiyi xəbərə görə, bunu mərhum eks-prezident Ayaz Mütəllibovla vida mərasimində millət vəkili Vahid Əhmədov deyib.

"Mən Prezident İlham Əliyevə və Birinci vitse-prezident Mehriban Əliyevaya təşəkkür edirəm ki, onun dəfninin dövlət səviyyəsində təşkil olunmasına dəstək oldular. Çox sağ olsunlar. Xatirimdədir, mən təzəcə baş nazirin birinci müavini təyin olunmuşdum. O zaman cəbhəçilərlə problem yaranmışdı. Mənə dedi ki, sənin onlarla münasibətin çox yaxşıdır, onlarla danışın, problem yaranmasın, barışıq olsun. O, barışıq, sülh adamı idi. Mən də bildirdim ki, cəbhəçilər artıq qərarlarını veriblər. O, istəsəydi, bir kəlmə ilə məsələni kökündən həll edə bilərdi. Amma buna getmədi, hakimiyyətdən çəkildi. Ayaz Mütəllibov uzun müddət Rusiyada yaşadı. Sonra ailəsinə qovuşdu. O, çox çətin bir dövrdə Azərbaycana rəhbərlik edib. Allah ona rəhmət eləsin!", - V.Əhmədov bildirib.