Tarixi torpaqlarımıza geri qayıdacağıq - Deputat

“Azərbaycan tərəfindən irəli sürülmüş təkliflərdən biri də sərhədlərin demarkasiya və delimitasiya olunmasıdır. Qazaxın 7 kəndi və Naxçıvanın kərki ərazisi bu proseslərdən sonra Azərbaycana qaytarılacaq”.

Bunu Publika.az-a açıqlamasında millət vəkili Cavid Osmanov deyib.

Deputat qeyd edib ki, artıq müzakirələr ölkəmizin təklif etdiyi şərtlər fonunda davam etdirilir: “Azərbaycan Xarici İşlər nazirinin müavini Xələf Xələfov da açıqlamasında qeyd etdi ki, delimitasiya və demarkasiya işləri başlayarkən bu kəndlər də Azərbaycana qaytarılacaq. Birmənalı olaraq söyləmək olar ki, sərhədlər dəqiqləşdirildikdə tarixi torpaqlarımıza geri qayıdacağıq. Azərbaycan bir qarış torpağından belə əl çəkməyəcək. Gələcəkdə həmin ərazilərdə bizim qanunlarımız fəaliyyət göstərəcək və bayrağımız dalğalanacaq. Digər tərəfdən müzakirələr aparılır və bu proseslər bitdikdən sonra işçi qrupları tərəfindən sərhədlərin demarkasiya və delimitasiya olunması başa çatacaq. Yəni bütün bu işlər bir müddət zaman alacaq, ancaq Azərbaycan öz istədiklərinə nail olacaq”.