Elşən Musayev: “Xədicəni alnından öpüb göz üstəmi qoymaq lazım idi?”

Demokratik Maarifçilik Partiyasının sədri, politoloq Elşən Musayev öz “Feysbuk”səhifəsində diqqət çəkən bir status paylaşıb. Publika.Az həmin statusu olduğu kimi təqdim edir.

“Ceyhun Osmanlının Xədicə İsmayılla bağlı Baş Prokurorluğa təqdim etdiyi audio-yazı ətrafında gedən müzakirələr mənə uşaqlıqda eşitdiyim çox ibrətamiz bir misalı xatırlatdı: “Demək, bir gün kənddə birinin inəyini oğurlayırlar. Səhər bütün qonşular yığışır və başlayırlar baş verən hadisə ilə bağlı müzakirələr aparmağa. Biri ev yiyəsinə deyir: “bax əgər gecə ayıq yatsaydın başına bu halu-qəza gəlməzdi, digəri deyir: ”həyətin işıqlarını yanıq qoysaydın, inəyini kimsə cürət edib oğurlamazdı”, başqa biri deyir: “gərək tövlənin qapısına bərk qıfıl vuraydın ki, açmaq mümkün olmasın”və s ilaxır...

Əlqərəz, hərə bir versiya irəli sürür və sonucda bir adam hadisənin əsl “qəhrəmanını”, yəni oğrunu ittiham eləmir...

***

İndi haqqında danışılan məsələ də təxminən eyni məzmundadır. Və ya əsl “qəhrəman”- yəni Xədicə, eyni zamanda onun sərgilədiyi iyrənc motivli əməllər qalıb bir yanda, məmə yeyəndən pəpə deyənə qədər hamı Osmanlıya “hüquq”,”qanun” xırdalayır...Həm də müdrikyanə görkəm alaraq!

Halbuki şəxsən mənə çox maraqlıdır: Vətən və dövlətin göz-görəsi bir şəkildə satıldığı yerdə normal adamın verə biləcəyi reaksiya necə olmalı idi? - Xədicəni alnından öpüb göz üstəmi qoymaq lazım idi, yoxsa elədiyi “qəhrəmanlıqdan”dolayı təltif olunması üçün dövlət orqanlarına müraciətmi ünvanlamaq?”