Ermənilər Qarabağda qanunlarımıza tabe olaraq yaşaya bilərlər - Mirbəşiroğlu

“İmzalanmış birgə bəyanatda Dağlıq Qarabağın statusu ilə bağlı heç bir məqam yer almayıb. Təbii ki, yer almayıbsa, onda burada hər hansı məsələnin də müzakirəsi aktual deyil. Azərbaycanın mövqeyi həmişə ondan ibarət olub ki, ermənilər Azərbaycanın digər vətəndaşları kimi qanunlarımıza tam tabe olaraq yaşaya bilərlər”.

Bu sözləri Publika.az-a açıqlamasında millət vəkili Elşad Mirbəşiroğlu deyib.

O bildirib ki, Azərbaycan tərəfi ermənilərin təhlükəsizliyinə təminat verir: “Bugünkü reallıq ondan ibarətdir ki, Azərbaycan ərazisində yaşayan ermənilər Azərbaycanın qanunlarına tam tabe olaraq digər vətəndaşlar kimi öz mövcudluqlarını sürdürə bilərlər”.

E.Mirbəşir onu da qeyd edib ki, Azərbaycan bu gün öz ərazi bütövlüyünü bərpa edir:“Hesab edirəm ki, bu, bizim tarixi qələbəmizdir. Çünki Azərbaycan düşmən Ermənistanı sülhə məcbur etdi. Münaqişənin dinc vasitələrlə tənzimlənməsi bir nəticə vermədi. Biz həmişə dediyimizə uyğun olaraq hərbi yolla torpaqlarımızı işğaldan azad etdik və düşməni kapitulyasiyaya məcbur etdik. Bu gün qəbul edilən istənilən qərar qanuna uyğun olaraq haqlı və güclü olan Azərbaycanın maraqlarına tam cavab verməlidir”.

Şamo Emin