İƏT Azərbaycanla sıx əməkdaşlıq edir - Deputat

İslam Əməkdaşlıq Təşkilatının Təmas Qrupu üzvləri işğaldan azad olunmuş rayonlarımıza bu gün səfər edib. Onlar ermənilərin 44 günlük müharibədə və eləcə də işğal müddətində nəzarətdə saxladıqları ərazilərdə törətdikləri vəhşiliklərlə yerindəcə tanış olublar. Talan edilmiş məscidlərimizi və dağıdılmış məzarlıqları ziyarət ediblər.

Bu sözləri Publika.az-a açıqlamasında millət vəkili Ceyhun Məmmədov deyib. Deputat bildirib ki, bu səfər bir çox cəhətdən əhəmiyyət kəsb edir:

“Hadisələri media və televiziyadan baxıb izləməklə o vəhşilikləri yerində görməyin yaratdığı təəssüratlar fərqlidir. Pakistandan və digər ölkələrdən olan nümayəndələrin fikirləri artıq mətbuatda yayımlanıb və bildirilib ki, xüsusilə məscidlərin və məzarların dağıdılması İslam dini və mədəniyyətinə qarşı böyük hörmətsizlikdir. Qeyd olunub ki, Ermənistanın uzun müddət işğalda saxladığı torpaqlarda törətdiyi barbarlığı və ekoloji cinayətləri dünya ictimaiyyətinə çatdırılacaq. Bu, çox vacib missiyadır. Dünya görməlidir ki, əslində əsl barbar xalq məhz Ermənistanın özüdür”.

Millət vəkili qeyd edib ki, İslam Əməkdaşlıq Təşkilatı Azərbaycanla sıx əməkdaşlıq edir:

“Bu səfər də həmin əməkdaşlığın nəticəsidir. Qonaqlar öz ölkələrinə qayıtdıqdan sonra o dəyişikliklər barədə müasir strukturları məlumatlandıracaq. Beləliklə ermənilərin ifşası istiqamətində uğurlarımızı artırmaq imkanı əldə edəcəyik. Ümumiyyətlə, Təmas Qrupu münaqişənin həllini sürətləndirmək və böyük dövlətlərin diqqətini bu problemə yönəltmək istiqamətində hər zaman fəal rol oynayıb”.

Aytən Məftun