Prezidentin aqrar sektora diqqəti təsadüfi deyil - Rəy

“Aqrar təsərrüfatın inkişafı Azərbaycan xalqının qədim mədəni irsidir. Ölkə Prezidentinin Azərbaycan iqtisadiyyatının şaxələnməsində məhz aqrar sektora böyük diqqət yetirməsi təsadüfi deyil”.

Bunu Publika.az-a açıqlamasında Milli Məclisin deputatı Asim Mollazadə ölkə başçısının Hacıqabula səfəri və səfər çərçivəsində fermerlərlə görüşdə səsləndirdiyi fikirlərə münasibət bildirərkən deyib. Deputat qeyd edib ki, bu sahə Azərbaycan iqtisadiyyatının təməl xəttinə çevrilə bilər:

“Həmin istiqamətdə məhz əsas yol fermer təsərrüfatlarının inkişafından keçir. Eyni zamanda, Azərbaycan fermerlərinin bu istiqamətdəki əməyini də xüsusi qeyd etmək lazımdır. Dövlət tərəfindən onlara dəstək verilir. Son vaxtlar Prezident fermer təsərrüfatlarının su ilə təminatına xüsusi diqqət yetirir. Yəni suvarmanın daha da təkmilləşdirilməsi və bu istiqamətdə yeni texnologiyaların istifadəsi ilə bağlı çox ciddi qərarlar qəbul etdi”.

Asim Mollazadə ümidvardır ki, fermer təsərrüfatlarını bir çox istiqamətlərdə - yeni gübrələrlə, müvafiq kreditlərlə dəstəkləyərək biz ölkə iqtisadiyyatının çox mühüm bir sahəsini gücləndirə bilərik:

“Bu, ölkəmizin, xalqımızın rifahı üçün vacib amildir. Bununla yanaşı, Azərbaycan dövləti xalqımızın bu qədim mədəni irsinin daha da inkişaf etdirilməsinə mühüm töhfə verəcək”.

Tural Turan