Deputat: “Ermənistanın bundan imtina etməyə haqqı yoxdur”

Ermənistanın 10 noyabr sazişindən imtina etməyə haqqı yoxdur. Baş nazir Nikol Paşinyan imzası ilə öz razılığını bildirib.

Bu sözləri Publika.az-a açıqlamasında millət vəkili Aydın Mirzəzadə deyib. Deputat qeyd edib ki, əgər 10 noyabr sazişi qüvvədən düşərsə, Azərbaycan digər məsələlərdə sərbəst hərəkət edə biləcək:

“Zəngəzur dəhlizi təkcə Azərbaycanın deyil, regionun və Ermənistanın maraqlarına uyğun bir layihə olacaq. Ermənistan bu layihə ətrafında daha çox siyasi ticarət etməyə çalışır. Bu məsələni özünün ölkədaxili siyasi çəkişmələrinin bir predmetinə çevirməyə çalışır. Amma Ermənistan konkret olaraq bildirməlidir ki, 10 noyabr sazişindən imtina edəcək, yoxsa yox? Bu sazişdən hər hansısa bir bəndi çıxarmaq və ya dəyişmək yalnız 3 tərəfin razılığı ilə ola bilər. Azərbaycan isə bu dəhlizin açılmasında qətiyyətli olduğunu bildirdi”.

Aydın Mirzəzadə Türkiyə Prezidentinin Azərbaycan parlamentində çıxışından da danışıb:

“Rəcəb Tayyib Ərdoğan çıxışına Qarabağ məsələsi ilə başladı və bununla da bitirdi. Bu məsələnin Azərbaycan üçün çox əhəmiyyətli olduğunu və Türkiyənin hər zaman Azərbaycanın yanında olduğunu bildirdi. O, Türkiyə-Azərbaycan birliyinin hər zaman davam edəcəyini vurğuladı. Hörmətli Ərdoğan türk dünyası və Azərbaycan-Türkiyə birliyinin möhkəmlənməsi üçün həmişə çalışıb”.

Rahib Ələsgərli