Onlar dünyaya qəti mesaj verdilər - Politoloq

“26 oktyabrda Türkiyə Prezidenti Rəcəb Tayyib Ərdoğanın II Qarabağ savaşından sonra 3-cü səfəri gerçəkləşdi. Bu səfər çərçivəsində Azərbaycan Prezidenti cənab İlham Əliyev və Türkiyə lideri cənab Rəcəb Tayyib Ərdoğan Füzuli Beynəlxalq Hava Limanının açılışını etdilər, Zəngəzur dəhlizinin təməlqoyma mərasimində iştirak etdilər və təqribən İran sərhədindən 10 kilometr məsafədə yerləşən Zəngilan rayonunun Ağalı kəndində birgə mətbuat konfransında iştirak etdilər”.

Publika.az xəbər verir ki, bu sözləri politoloq Samir Hümbətov qeyd edib. Ekspert bildirib ki, Türkiyə Prezidentinin Füzuli Beynəlxalq Hava Limanının tikintisindən sonra ilk xarici qonaq kimi bu hava limanına gəlişi və ölkə başçısı ilə birgə onun açılışında iştirak etməsi, hava limanının rəmzi açarlarını götürməsi siyasi mesaj xarakteri daşıyır:

“Bu o deməkdir ki, Füzuli Beynəlxalq Hava Limanı qapılarını ilk xarici ölkə olaraq Türkiyə təyyarələrinin üzünə açmış oldu və ehtimal olunur ki, Türkiyənin İstanbul, Ankara, İzmir və Bursa kimi böyük şəhərlərindən bura mütəmadi uçuşlar həyata keçirilə bilər. Bu isə qardaş Türkiyə şirkətlərinin Qarabağın yenidən qurulmasında daha da aktiv şəkildə iştirakını təmin etməklə yanaşı, həm də türk iş adamlarının regiona gəlişinin asanlaşmasına şərait yaratmış olur. Hər iki ölkə başçısının Zəngəzur dəhlizinin təməlqoyma mərasimində birgə iştirakı isə region və dünya dövlətlərinə verilmiş digər önəmli mesajlardan biri hesab edilə bilər. Bu təməlqoyma mərasiminin baş tutması ilə hər iki ölkə lideri açıq şəkildə bildirdi ki, Zəngəzur dəhlizinin açılmasına kimin qarşı çıxmasından asılı olmayaraq, bu dəhliz mütləq açılacaq.

Nəhayət, iki ölkə rəhbəri arasında baş tutan həm təkbətək görüş, həm də birgə keçirdikləri mətbuat konfransı seçildiyi yer və konfransda söylənilən fikirlər baxımından vacib əhəmiyyətə malik mesaj kimi qəbul edilə bilər. Onu da qeyd etmək lazımdır ki, Türkiyə Prezidentinin Azərbaycana səfərindən və burada iştirak etdiyi tədbirlərdən sonra Rusiya mətbuatında Azərbaycana qarşı ritorikanın dəyişməsi və nisbətən aqressiyanın artması hiss edilməkdədir. Bu aqressiya içərisində əsas yeri Dağlıq Qarabağ termininin işlədilməsi tutur”.