Bu anlaşma Azərbaycan iqtisadiyyatına töhfə verdi - Deputat

Bu gün Ulu öndər Heydər Əliyevin anım günüdür. Ümummilli lider Heydər Əliyevin 1993-cü ildə Azərbaycan rəhbərliyinə qayıdışı ilə ölkənin ictimai-siyasi, sosial-iqtisadi həyatında yeni bir dönüş yarandı.

Publika.az xəbər verir ki, bunu millət vəkili Vüqar Bayramov qeyd edib.

Deputat bildirib ki, müstəqilliyin ilk illərində ölkə iqtisadiyyatında müşahidə edilən tənəzzül ötən əsrin 90-cı illərinin ortalarında aradan qaldırıldı və iqtisadiyyatın stabilləşməsinə baza formalaşdırıldı: "Həmin dövrdə həyata keçirilməyə başlanan islahatlar uzunmüddətli dövrdə Azərbaycan iqtisadiyyatında inkişaf trayektoriyalarını müəyyənləşdirdi. Qısa müddət sonra, 1994-cü il sentyabrın 20-də Xəzər dənizinin Azərbaycan sektorunda "Azəri", "Çıraq" yataqlarının dərinlikdə yerləşən hissəsinin birgə işlənməsi və hasil olunan neftin pay şəklində bölüşdürülməsi haqqında dünyanın 11 ən iri neft şirkəti ilə müqavilə imzalandı. Bu anlaşma Azərbaycanın siyasi-iqtisadi müstəqilliyinin qorunub saxlanması üçün xüsusi rola malik olmaqla, uzunmüddətli dövrdə ölkənin valyuta ehtiyatlarının formalaşmasına töhfə verməkdədir".

V.Bayramov qeyd edib ki, həmin dövrdə formalaşdırılan enerji siyasəti bu müqavilə ilə dünyanın ilk neft hasilatçılarından olan Azərbaycanı beynəlxalq enerji bazarlarında birbaşa iştirakçıya çevirdi: "Nəticədə enerji resursları ölkəmiz üçün yalnız dövlət gəlirlərinin artım mənbəyi deyil, həmçinin ciddi geosiyasi faktora çevrildi. Ölkəmiz artıq regionun enerji təhlükəsizliyinə töhfə vermiş dövlətlərdən sayılır və bu, Azərbaycanın müstəqil xarici siyasət imkanlarını möhkəmləndirdi. Ümummilli lider Heydər Əliyevə Allahdan rəhmət diləyir, dərin hörmət və ehtiramla yad edirik!"