Bu, həmin Vardanyandır ki, Azərbaycanla... - ŞƏRH

Erməni millətçiləri elə hesab edirdilər ki, Azərbaycanın torpaqlarını, tarixini, mədəniyyətini mənimsəyə biləcəklər. Onlar Azərbaycan ərazisində separatçı bir rejim yaratmaqla ölkəmizə meydan oxuya biləcəklərini düşünürdülər. Amma axı tarixi ədalət gec-tez öz yerini tapır. Bunu unutmaq olmaz.

Bu fikirləri Publika.az-a açıqlamasında Milli Məclisin üzvü, politoloq Aydın Mirzəzadə bildirib.

Millət vəkili Rusiyadan ölkəmizin ərazisinə qeyri-qanuni şəkildə daxil olaraq, separatçı rejimin rəhbərlərindən birinə çevrilmiş Ruben Karleni Vardanyanın Azərbaycanı tərk edərkən saxlanılmasına münasibət bildirib:

"Xatırladım ki, bir neçə gün bundan öncə o, Xankəndini tərk etməyəcəyini bildirmişdi. Lakin nədənsə vəziyyət dəyişən kimi oradan qaçmağa üz tutdu. Bu, həmin Vardanyandır ki, təqribən 1 il bundan əvvəl Azərbaycanın hakimiyyət orqanlarının separatçı rejimin qanunsuz olaraq fəaliyyət göstərdiyi ərazidə təbii sərvətlərin vəziyyətini yoxlamaq üçün göndərdiyi komissiyanın fəaliyyətinə mane olmuşdu. Bununla yanaşı, Azərbaycan Mərkəzi hakimiyyətinə xəbər göndərərək, danışıqların ancaq onunla aparılmasını tələb etmişdi. Vardanyan, eyni zamanda, vaxtaşırı dünyanın tanınmış mətbuat orqanlarına Azərbaycanla bağlı yalan, böhtan və təhqirlərlə dolu məlumatlar təqdim edirdi. Baxın, bu gün isə ölkəmizdən qorxaqcasına qaçmaq istəyir. Bu istək onun bir təxribatçı, cani olduğunu sübuta yetirir".

A.Mirzəzadə əlavə edib ki, Ruben Vardanyan ölkəmizin ərazi bütövlüyünə qarşı fəaliyyətinə görə qanunlar qarşısında cavab verməlidir və onunla birlikdə digər canilər də məhkəmə önünə çıxarılmalıdır.

Mehti Kamiloğlu