Vüqar Rəhimzadə: "Onlar ictimai nüfuzlarının nə qədər olduğunu ortaya qoydular"

Günlərdir müxtəlif vasitələrlə Məmmədəmin Rəsulzadənin ildönümünü “möhtəşəm aksiya”ya çevirəcəklərini bəyan edən “Milli şura” adlı qurum, Müsavat, AXCP və digər partiyalar abidənin yanına cəmi 200-300 adam yığa bildi. Bununla da onlar ictimai nüfuzlarının nə qədər olduğunu ortaya qoymuş oldular.

Bu sözləri Publika.az-a açıqlamasında “İki sahil” qəzetinin baş redaktoru Vüqar Rəhimzadə deyib.

Onun sözlərinə görə, istər 20 Yanvar günü Şəhidlər Xiyabanında ictimai asayişin pozulması, istərsə də bu gün belə bir “aksiya”nın təşkili onların illərdir təşkil etdikləri şounun bir parçasıdır:

“Yanvarın 19-da “Məhsul” stadionunda uzun illərdən bəri iki minlik baryeri aşaraq 2800 adam toplayan radikal müxalifət potensialının son dərəcə biabırçı vəziyyətdə olduğunu nümayiş etdirdi. Onlar hər zaman saxta və riyakar fikirlər səsləndirirlər, daxili xislətlərini ortaya qoyurlar. Əslində yanvarın 19-da keçirilən mitinqə gələnlərin çoxu ora şouya baxmağa gəlmişdi. 20 Yanvar günü Şəhidlər Xiyabanına ziyarət zamanı da şou göstərməyə çalışdılar. Polisin onlara mane olduğunu iddia etdilər. Əksinə özləri həmin gün nizam-intizamı, ictimai asayişi pozmaqla şou düzəltməyə çalışdılar. Lakin bu gün həmin ərazidə heç polis də yox idi. Bəs nə üçün cəmi 100-200 adam toplaya bildilər? Bəzi partiyalar isə 3 nəfərlə qatılıb. Bu həqiqətən də radikal müxalifətin nə dərəcədə ə acınacaqlı durumda olduğunu sübut edir. Bugünkü hadisə onlara ictimai dəstəyin olmadığını və yalanlarını üzə çıxardı. Bu gün həm də onlar nə qədər əsl tərəfdarının olduğu aydın oldu”.