Bizi ciddi sınaqlar gözləyir - Ceyhun Məmmədov

“Prezident İlham Əliyev işğaldan azad edilən ərazilərə səfər etdi, orada müəyyən açıqlamalar verdi, eləcə də hər kəsi yaranan reallıqları qəbul etməyə çağırdı. Bundan sonra bəzi dövlətlər narahat oldu, Azərbaycana, onun hökumətinə qarşı çıxışlar başlandı”.

Publika.az xəbər verir ki, bunu Milli Məclisin plenar iclasında çıxışı zamanı deputat Ceyhun Məmmədov deyib.

O əlavə edib ki, Azərbaycana qarşı həyata keçirilən tədbirlərdən biri də dini pərdə altında olunur: “Məhz din amilindən istifadə edərək dövlətin keçirdiyi siyasətə qara yaxmağa, insanları dövlətə qarşı qaldırmağa çalışırlar. Baş verənlər göstərir ki, bu prosesdə din amilindən istifadə olunur. Azərbaycan hökuməti sionizmdə ittiham olunur. Hətta buna haqlı olaraq cavab verən həmkarlarımız “sionizmin qulları” kimi təqdim olunur. Hesab edirəm ki, dini təhlükəsizliyi, din sahəsində proseslərə nəzarəti gücləndirmək, din sahəsində çevik qərarlar verməyə hazır olmaq lazımdır. Bizi qarşıda ciddi sınaqlar gözləyir, bu prosesə hazır olmalıyıq”.