Ordumuz qələbəni buna görə qazandı - Ekspert DETALLARI AÇDI

Bütün Azərbaycan xalqı ilə birlikdə sevinirəm, əsas məqam ondan ibarətdir ki, biz Laçını döyüşsüz aldıq, qan tökməmişik, şəhid verməmişik.

Bu sözləri Publika.az-a açıqlamasında hərbi ekspert Azad İsazadə deyib. O bildirib ki, Laçın strateji baxımdan çox vacib rayondur:

“Ermənistanla Qarabağ arasında yerləşən rayon həmişə strateji rol oynayıb. Üstəlik, Laçının dağları da strateji əhəmiyyət daşıyan yüksəkliklərdir. Bu yüksəkliklər indi bizim əlimizdədir. Laçın dəhlizi artıq düşmənin əlindən çıxıb, bu əraziyə hələlik Rusiya sülhməramlıları nəzarət edir. Laçının qaytarılması ilə biz dayanmırıq, siyasi-diplomatik müharibə davam edir, Laçında yaşayan azərbaycanlıların köçürülməsi, Türkiyə sülhməramlılarının gəlib nəzarət etməsi, eyni zamanda Azərbaycan-Ermənistan sərhəd-gömrük və digər məsələləri həll etməliyik”.

Hərbi ekspert qeyd edib ki, Azərbaycan Ordusunun 44 gün ərzində Ermənistan üzərində parlaq qələbə qazanmasının səbəblərindən biri hərbi texnikanın daha müasir olmasıdır:

“Son bir neçə ildə Azərbaycanın dövlət büdcəsindən irihəcmli vəsaitlər məhz ordunun inkişafına, onun təchizatının yüksəlməsinə ayrılıb. Uğurun başqa bir sirri odur ki, Azərbaycan bu müharibəyə daha hazırlıqlı idi. Texnika məsələni həll etmir, texnikanı idarə edən əsgər və zabitlərimizdir. Bu baxımdan Azərbaycan əsgəri daha peşəkar tərpəndi və bu peşəkarlıq nəticəsində də qələbəni əldə edə bildik. Azərbaycan Ordusu ən çətin döyüş tapşırıqlarını çox böyük rəşadətlə yerinə yetirdi”.

Aytən Məftun