Şuşa dünyanın ən abad şəhərlərindən birinə çevriləcək - Deputat

Prezident İlham Əliyev Şuşanın bərpasını sürətləndirmək məqsədilə 2022-ci ili "Şuşa İli" elan etdi. Şuşa şəhərinin təməli 1752-ci ildə Pənahəli xan tərəfindən qoyulub. Bu il Azərbaycan xalqı tarixi Şuşa şəhərinin 270 illiyini qeyd edəcək.

Publika.az xəbər verir ki, bunu millət vəkili Ceyhun Məmmədov qeyd edib.

Deputat bildirib ki, Şuşa Azərbaycanın mədəniyyət paytaxtıdır. O əlavə edib ki, Şuşa həm də bir çox dini abidələrlə zəngin tarixi şəhərlərimizdəndir: "Şuşa işğaldan azad olunduqdan sonra özünün yeni inkişaf mərhələsinə daxil olub. Ötən il Şuşada bir çox mədəni tədbirlər, festivallar keçirilib. Bu, həm də Azərbaycan xalqının Prezident İlham Əliyevin rəhbərliyi ilə Şuşaya verdiyi əhəmiyyətin və dəyərin göstəricisidir".

C.Məmmədov vurğulayıb ki, hazırda Şuşadakı dini-tarixi, mədəniyyət abidələrimiz sürətlə təmir və bərpa olunur: "Şuşada yeni məscid, yaşayış binaları inşa olunur. Şuşa tezliklə dünyanın ən abad və gözəl şəhərlərindən birinə çevriləcək. Şuşa ilimiz mübarək!"