Gənclərimiz inklüziv inkişafa dəstək olacaq - Deputat

Ölkəmizdə 10 milyon 119 min əhalinin 2 milyon 305 mini 14-29 yaş arasında olan vətəndaşlarımızdır. 20-29 yaş arası gənclərin sayı isə 1 milyon 560 min nəfərdir. Son illər gənclər ölkənin ictimai həyatında daha aktiv şəkildə iştirak edirlər. Xüsusən də son təyinatlarda gənclərə üstünlük verilməsi gənclərimizin idarəetmədə də daha fəal iştirakından xəbər verir.

Publika.az xəbər verir ki, bunu millət vəkili Vüqar Bayramov qeyd edib.

Deputat bildirib ki, dayanıqlı inkişaf inklüzivlik tələb edir: “Bu baxımdan gənclərin iqtisadi proseslərdə daha yaxından iştirakı inklüziv inkişafın güclənməsi aspektindən önəmlidir. Xüsusən də gənc sahibkarların dəstəklənməsi və “start-up” yaradıcılara dövlət dəstəyinin artırılması prioritet hesab olunur”.

V.Bayramovun sözlərinə görə, inkişaf etmiş ölkələrin təcrübəsi göstərir ki, innovasiya daha çox gənclərdən gəlir: “Buna görə də artıq yeni dönəmdə gənclərin məşğulluğu, onların sahibkarlıq sektorunda fəal iştirakının dəstəklənməsi daha da prioritet olmalıdır”.

Millət vəkili əlavə edib ki, torpaqlarımızın işğaldan azad olunmasında gənclərimizin əvəzsiz rolu oldu: “Əminik ki, gənclərimiz region üçün yeni düzənin formalaşdığı bu mərhələdə də fəal şəkildə inklüziv inkişafa dəstək olacaq. Gününüz Mübarək, Əziz Gənclər!”