Bağçalara qəbul nə vaxt başlayır? - RƏSMİ

“Uşaq bağçalarına qəbula iyul ayından başlaması nəzərdə tutulub”.

Publika.az xəbər verir ki, bunu Təhsil Nazirliyinin Ümumi təhsilin təşkili və idarə olunması şöbəsinin müdiri Elnur Əliyev “Təhsil masası”nda deyib.

O qeyd edib ki, hazırda bu istiqamətdə hazırlıq işləri görülür.

Ümumi və məktəbəqədər təhsildə məzmun, tədris və qiymətləndirmə şöbəsinin müdiri Vəfa Yaqublu isə bildirib ki, 2012-ci ildə təsdiq edilmiş kurikulum 3-6 yaşı əhatə edirdi. Yeni dövlət standartı 1-6 yaşları təsbit edir, yəni burada 1-6 yaşlı uşaqların nələri öyrənməli olduqlarından söhbət gedir.

Onun sözlərinə görə, Təhsil naziri Emin Əmrullayevin əmri ilə təsdiqlənən “Məktəbəqədər təhsil proqramı (kurikulum)” 2012-ci ildən tətbiq edilən kurikulumun yenilənməsidir.

"Məktəbəqədər təhsil haqqında proqram təkmilləşdirilib, ləğv edilməyib. Yeni dövlət standartı 1-6 yaşları təsbit edir. 1 yaşlı uşağın təhsili dedikdə onların parta arxasında əyləşdirib yazmaq-öyrətmək yox, məşğələlərin oyun formasında olmasından söhbət gedir", - deyə o əlavə edib.