Qazaxlar Xəzərdə 4 azərbaycanlını saxladılar

Qazaxıstan sərhədçiləri Xəzər dənizində 4 azərbaycanlı brakonyer saxlayıblar.

Trend-in məlumatına görə, bu barədə Qazaxıstan Xəbərləri İA Qazaxıstan Milli Təhlükəsizlik Komitəsinin (QMTK) sərhəd xidmətinin məlumatında bildirilir.

Məlumatda qeyd olunur ki, saxlanılanlar asma tipli mühərriklə təchiz olunmuş "Bayda" kiçik qayıqda brakonyerlik fəaliyyəti ilə məşğul olublar. Brakonyerlər saxlanılarkən silahdan istifadə olunub və onlardan çoxlu sayda nərə balığı müsadirə edilib: "Sərhəd pozucuları Milli Təhlükəsizlik Komitəsinin sərhəd xidmətinə məxsus “Taraz” gəmisində olan sərhədçi heyətin tələbinə reaksiya verməyib və yüksək sürətlə hərəkət ediərək Qazaxıstanın daxili sularından qaçmağa çalışıblar. Havaya 2 xəbərdarlıq atəşi açılandan sonra brakonyerlər təslim olublar. Silah tətbiqi zamanı xəsarət alan olmayıb".

Qayığa baxış zamanı çəkisi 946 kq olan kallada ilə dolu 25 qutu və 240 ədəd nərə balığı aşkar edilib.

Saxlanılma ilə bağlı hüquq-mühafizə orqanları məlumatlandırılıb. Hazırda faktla bağlı araşdırma aparılır.