Ermənistan gömrüyündə kütləvi həbs

Ermənistan Dövlət Gəlirləri Komitəsinin əməkdaşları külli miqdarda rüşvət alarkən tutulublar. 15 vergi məmuru cinayət işi üzrə təqsirləndirilir. Onlardan 12-si məhkəmənin qərarı ilə həbs edilib.

Publika.az xəbər verir ki, bu barədə cinayəti araşdıran Ermənistan Milli Təhlükəsizlik Xidməti məlumat yayıb.

Milli Təhlükəsizlik Xidmətinin məlumatına görə, 2022-ci ilin noyabrından 2023-cü ilin yanvarına qədər bir qrup DSX məmuru müxtəlif malların idxalı ilə məşğul olan iş adamlarını “qoruyurmuşlar”. İş adamları yükdaşımanın real dövriyyəsini və həcmini gizlətmək, habelə vergi və gömrük rüsumlarını ödəməmək müqabilində vergi müfəttişlərinə külli miqdarda rüşvət veriblər.

İstintaq zamanı o da müəyyən edilib ki, Ermənistan Dövlət Gəlirləri Komitəsinin yüksək rütbəli məmuru tabeliyində olan işçinin yol verdiyi sui-istifadə hallarını bilə-bilə onun cinayət məsuliyyətinə cəlb edilməsi üçün müvafiq tədbirlər görməyib, əksinə, ondan pul mükafatı alıb.

İlkin istintaq çərçivəsində 30-dan çox axtarış aparılıb, həmin şəxslərin cinayətdə iştirakını təsdiq edən məlumatlar əldə edilib, həmçinin bir neçə qanunsuz odlu silah-sursat götürülüb. İbtidai instintaq davam edir.

Ayşən