Strateji danışıqlar üçün kritik səfər: Hakan Fidan bu ölkəyə gedir

Türkiyənin xarici işlər naziri Hakan Fidan strateji danışıqlar üçün ABŞ-a gedir.

Publika.az xəbər verir ki, bu barədə “Hurriyet Daily News” məlumat yayıb.

Fidanın Vaşinqtona səfəri çərçivəsində dövlət katibi Marko Rubio ilə strateji danışıqlar aparacağı bildirilir.

Adı açıqlanmayan türk diplomatik mənbələri Fidanın martın 25-26-da Vaşinqtonda olacağını bildirib.

“Danışıqlarda Türkiyə-ABŞ ikitərəfli münasibətlərində atıla biləcək strateji addımlar və dövlət başçısı səviyyəsində gələcək səfərlərə hazırlıq məsələlərinin müzakirə olunacağı gözlənilir”, - məlumatda deyilir.

Mənbələrin bildirdiyinə görə, Rusiya-Ukrayna müharibəsi məsələsində Fidan Ankaranın illər ərzində sülhməramlı təşəbbüslərini xatırlatmağı və Türkiyənin ABŞ-ın daimi sülh razılaşmasına gətirib çıxaracaq atəşkəsə nail olmaq səylərinə kömək etməyə hazır olduğu mesajını çatdırmağı planlaşdırır.

Fidan ABŞ-ı hökumətin dəyişdiyi Suriyaya qarşı sanksiyaları ləğv etməyə, humanitar yardım və yenidənqurmaya dəstək məsələlərində əməkdaşlıq etməyə çağıracaq. Müzakirələrdə həmçinin İŞİD-ə qarşı mübarizədə əməkdaşlıq və Suriyanın şərqindəki həbsxanalar və düşərgələrin monitorinqi müzakirə olunacaq. Türkiyəli nazir həmçinin ABŞ-ı İsrail-Fələstin münaqişəsində davamlı atəşkəs üçün “İsrailə təsirindən istifadə etməyə” çağıracaq.

Tural