İrandan gizli ssenari - Əgər Xamenei öldürülərsə...

Əli Xamenei ABŞ ilə mümkün hərbi münaqişə zamanı özünün öldürülməsi və ölkənin idarəetmə sistemində yarana biləcək pozuntular ehtimalı ilə bağlı fəaliyyət planının hazırlanmasını tapşırıb.

Publika.az xəbər verir ki, bu barədə "The New York Times" altı yüksəkvəzifəli iranlı məmura və İslam İnqilabı Keşikçiləri Korpusu (SEPAH) nümayəndələrinə istinadən məlumat yayıb.

Nəşrin yazdığına görə, Xamenei səlahiyyətlərinin bir hissəsini dar etibarlı şəxslər dairəsinə ötürüb və həm hərbi, həm də mülki idarəetmədə çoxsəviyyəli varislik sisteminin yaradılmasını tapşırıb. Rəhbər şəxslərə Xamenei ilə əlaqənin kəsilməsi və ya onun həlak olması ehtimalına qarşı dördə qədər mümkün müavin müəyyən etmək göstərişi verilib.

Əsas qərarların koordinasiyasını isə o, parlamentin keçmiş spikeri və Ali Milli Təhlükəsizlik Şurasının katibi Əli Laricaniyə həvalə edib. "The New York Times"in məlumatına əsasən, son aylarda Laricaninin nüfuzu artıb. O, daxili təhlükəsizlik məsələlərinə, müttəfiqlərlə təmaslara nəzarət edir və Vaşinqtonla nüvə proqramı üzrə danışıqlarda iştirak edir.

İsraillə son gərginlik fonunda ali rəhbərin üç mümkün varis müəyyənləşdirdiyi bildirilir, lakin onların adları açıqlanmır. Laricani din xadimi olmadığı üçün bu siyahıya daxil edilməyib.