İran ABŞ qarşısında geri çəkilir? - “Lazım olan hər şeyi etmək istəyirik”

İran nüvə məsələsi ilə bağlı ABŞ-la mümkün qədər tez razılığa gəlmək üçün lazımi addımları atmağa hazırdır.

Publika.az xəbər verir ki, bu barədə İslam Respublikasının xarici işlər nazirinin müavini Məcid Taxt-Ravançi NPR radiosuna müsahibəsində bildirib.

"Biz ABŞ-la ən qısa zamanda razılığa gəlməyə hazırıq və bunun baş tutması üçün lazım olan hər şeyi etmək istəyirik", - deyə diplomat qeyd edib.

Fevralın 22-də İranın xarici işlər naziri Abbas Araqçı bəyan edib ki, ölkəsinin ABŞ-la nüvə razılaşması proqramın dinc xarakterini təsdiqləyən sadələşdirilmiş formaya malik olmalı və sanksiyaların ləğvini ehtiva etməlidir. Onun sözlərinə görə, Birgə Hərtərəfli Fəaliyyət Planının (JCPOA) imzalanmasından artıq 10 il keçib və bu müddət ərzində Tehranın nüvə proqramı xeyli irəliləyib.

Fevralın 20-də "The Wall Street Journal" qəzeti yazmışdı ki, ABŞ prezidenti Donald Tramp İranı nüvə sazişi üzrə Vaşinqton üçün əlverişli şərtlərə razı salmaq məqsədilə bu ölkəyə məhdud zərbə endirilməsi ehtimalını istisna etmir.

Cenevrədə keçirilən ABŞ-İran danışıqlarında Tehran Vaşinqtonun nüvə proqramı ilə bağlı əsas narahatlıqlarını aradan qaldırmaq üçün yüksək dərəcədə zənginləşdirilmiş uran ehtiyatlarının bir hissəsini üçüncü tərəfə, məsələn, Rusiyaya göndərməyi təklif edib. Nəşr iddia edir ki, İran tərəfi uranın zənginləşdirilməsini üç ilə qədər dayandırmağa hazırdır. Lakin Tramp administrasiyası proqramın tamamilə dayandırılmasında israr edir. Danışıqlar fonunda ABŞ regionda hərbi mövcudluğunu artırır, İran isə Hörmüz boğazını bağlaya biləcəyi ilə hədələyir.

Hüseyn İbadlı