Xameneidən atasının vəfatından 40 gün sonra YENİ BƏYANAT - “Bu, on əsas tələbdən biridir”

İran müharibəyə can atmır, amma öz hüquqlarından imtina etməyəcək.

Publika.az xəbər verir ki, bunu İran dövlət televiziyasının Ali rəhbər Müctəba Xamenei adından yaydığı bəyanatda bildirilib.

"İran müharibəyə can atmır, amma öz hüquqlarından imtina etməyəcək. Hörmüz boğazının idarə edilməsini mütləq yeni mərhələyə çıxaracağıq” - Müctəbanın atası, İranın əvvəlki Ali rəhbəri Əli Xameneinin vəfatından 40 gün sonra verilən bəyanatda deyilir.

O qeyd edib ki, bu strateji əhəmiyyətli dəniz yolu üzərində nəzarətin saxlanılması İranın Birləşmiş Ştatlarla danışıqları bərpa etmək üçün irəli sürdüyü on əsas tələbdən biridir.

İranın Ali Rəhbəri həmçinin ölkəyə dəymiş ziyana görə ABŞ və İsraildən təzminat tələb etmək niyyətində olduğunu bildirib.

"Hamı bilməlidir: biz ölkəmizə hücum edən cinayətkar təcavüzkarları rahat buraxmayacağıq. Mütləq təzminat tələb edəcəyik", – deyə Xameneyi vurğulayıb.

O, həmçinin qeyd edib ki, İran "müharibəyə can atmayıb və atmır", lakin heç bir şərt daxilində öz qanuni hüquqlarının reallaşdırılmasından imtina etməyəcək.

Hüseyn İbadlı