Gözəlliyiniz bu hormonlardan asılıdır

Bədəndə inkişaf hormonlarının, eləcə də melatonin və estrogen çatışmazlığı görünüş və sağlamlığa mənfi təsir göstərir. Bundan əlavə, bu, çəkinin artmasına da təsir edə bilər.

Publika.az xəbər verir ki, bu sözləri endokrinoloq Kamilya Tabeyeva "Gazeta.ru"ya müsahibəsində deyib.

O bildirib ki, melatonin çatışmazlığı yuxu pozğunluğu, baş ağrıları və immunitetin ümumi azalması ilə müşayiət olunur. Estrogenin azlığı isə əhval-ruhiyyənin, ağrıya dözümlülüyün azalmasına və bədənin termorequlyasiyasında dəyişikliklərə səbəb olur.

"Bu hormonun çatışmazlığı sidik sistemi problemlərinə və sümüklərin zəifləməsinə də yol açır. Onları haqlı olaraq "gözəllik və incəlik" hormonları hesab etmək olar. Estrogenlər bütün bədəndə və müvafiq olaraq dəridə hüceyrələrin yenilənməsində mühüm rol oynayır. Bundan əlavə, saçlara parlaqlıq verir, onları sağlam və gənc saxlayır. Sirkadiyalı ritmlərin tərkib hissəsi olan melatonin həm də antioksidant kimi fəaliyyət göstərir, sərbəst radikalları və oksidləşdirici stressi məhdudlaşdırır, bununla da yaşlanma prosesini ləngidir və xərçəng hüceyrələrinin fəaliyyətini əngəlləyir. Böyümə hormonu əzələlərin böyüməsində və bədəndəki yağ miqdarının azaldılmasında iştirak edir. Və somatotropin zülal sintezini və lipolizi - yağların turşulara parçalanması prosesini təşviq edir", - ekspert qeyd edib.

Mütəxəssis əlavə edib ki, bu hormonların səviyyəsi əsasən insanın apardığı həyat tərzindən asılıdır. Onlar idman və gündəlik gəzintilərlə stimullaşdırılır. Tam qaranlıqda yatmaq və pəhriz zülalları ilə zəngin düzgün qidalanmaq çox vacibdir. Eyni zamanda, Tabeyeva həddindən artıq hormonların təhlükəli olduğuna və müxtəlif xəstəliklərin yaranmasına səbəb ola biləcəyinə diqqət çəkib. Buna görə bədəndə onların səviyyəsini artırmağa başlamazdan əvvəl həkimə müraciət etməlisiniz.