Bu şəxslərə SMS icazə verilmir - Nazirlik rəsmisi

Ev şəraitində müalicə alan şəxslər yalnız simptomsuz və xəstəliyi yüngül keçirənlərdir.

Publika.az xəbər verir ki, bunu Səhiyyə Nazirliyinin aparatının rəhbəri Nadir Zeynalov Operativ Qərargahın bugünkü brifinqində deyib.

O bildirib ki, belə xəstələr dərmanla təchiz olunması nəzərdə tutlmayanlardır: "Onların müalicə prosesində immunitet sistemini gücləndirən vitaminlər istifadə olunur və sahə poliklinikalarının bunu çatdırması tövsiyə olunur. Eyni zamanda, xəstə insanların dərman almaq üçün aptekə getməsi düzgün deyil. Onların dərman təchizatı məsələsi həll olunacaqdır".

O bildirib ki, bu xəstələrin evdə müalicəsi xəstəxanaların və tibbi heyətin yükünü azaltmaq, tibbi xidmətin keyfiyyətini artırmaq üçündür: "Bu öhdəlik poliklinikaların üzərinə qoyulur. Poliklinika xidmətin ilkin hissəsini üzərinə götürdükdən sonra təcili yardımın yükünü azaldır".

Nadir Zeynalov əlavə edib ki, bəzi insanlar gec müraciət edir və evdə sağalmalarını gözləyirlər: "Əgər xəstəliyin ağırlaşmasını istəmiriksə, sahə poliklinikasına müraciət etməyi hamıya tövsiyə edirəm".