“Azərxalça”dan KİV-ə müraciət: ictimaiyyətdə çaşqınlıq...

Bu gün bəzi saytlarda “Azərxalça”nın müflis olması ilə bağlı xəbər dərc olunub. Burada söhbət keçmiş “Azərxalça” Elmi Yaradlcılıq İstehsalat Birliyindən gedir.

Publika.az xəbər verir ki, bu haqda “Azərxalça” Açıq Səhmdar Cəmiyyətinin mətbuat xidmətinin rəhbəri Tural Səfərov bildirib.

"İctimaiyyətin diqqətinə çatdırırıq ki, həmin qurumla Azərbaycan Respublikası Prezidentinin 2016- cı il 5 may tarixli Sərəncamı ilə yaradılan “Azərxalça” Açıq Səhmdar Cəmiyyətinin heç bir əlaqəsi yoxdur. “Azərxalça” ASC keçmiş “Azərxalça” nın hüquqi varisi deyil. Xəbər saytlarında dərc olunan xəbərdə “Azərxalça” ASC- nin filiallarından birinin fotoşəklinin verilməsi və keçmiş “Azərxalça”nın Cəmiyyət kimi təqdim olunması ictimaiyyət arasında çaşqınlıq yaradıb. Kütləvi informasiya vasitələrindən xahiş edirik ki, xəbər hazırlayarkən diqqətli olsunlar, ictimaiyyətdə çaşqınlıq yaratmasınlar", - açıqlamada deyilir.

Qeyd edək ki, bu gün ləğv edilmə prosesində olan “Azərxalça” Elmi Yaradıcılıq İstehsalat Birliyinin müflis elan edilməsi və iflas prosesinə başlanılmasına dair ərizəsinin mümkünlüyünə baxılıb. 1 saylı Bakı İnzibati-İqtisadi Məhkəməsinə “Azərxalça” Elmi Yaradacılıq İstehsalat Birliyinin rəhbəliyi müraciət edib. Briliyin müflis elan edilməsi, cəmiyyətin iflas prosesinə başlanılması barədə qətnamə qəbul edilməsi xahiş edilib.

Hakim Aytən Oruczadənin sədrliyi ilə keçirilən prosesdə ərizə və ərizəyə əlavə edilmiş sənədlər nəzərdən keçirilib. Hakim hesab edib ki, ərizəçi (borclu) tərəfindən verilmiş ərizə Azərbaycan Respublikası Mülki Prosessual Məcəlləsinin 149-cu maddəsi ilə müəyyən olunmuş formasına və məzmununun tələblərinə cavab vermədiyindən həmin Məcəllənin 152.1.1-ci maddəsinin tələblərinə uyğun olaraq geri qaytarılmalıdır.

İddia ərizəsindən və ona əlavə olunmuş sənədlərdən görünür ki, ləğv prosesində olan “Azərxalça” Elmi Yaradıcılıq İstehsalat Birliyinin ümumilikdə 405.006,4 manat borcu mövcuddur. Həmin borcun 17.327,01 manat hissəsi vergiyə, digər 72.366,42 manat hissəsi isə sosial sığorta borcuna aiddir.

Bu borclar ilə bağlı ərizəçi öz ərizəsində kreditor qismində Azərbaycan Respublikası Vergilər Nazirliyi yanında Bakı şəhəri Lokal Gəlirlər Departamentini göstərib.

Buna baxmayaraq, ərizəçi sözügedən 405.006,4 borcunun 296.389 manat hissəsini isə yalnız kredit borclarının olması ilə əsaslandırıb, lakin mövcud olan kreditorların siyahısını ərizəyə əlavə etməyib.

Belə olduğu halda məhkəmə hesab edib ki, ləğv prosesində olan “Azərxalça” Elmi Yaradıcılıq İstehsalat Birliyi ərizəni “Müflisləşmə və iflas” haqqında Qanunun tələblərinə, eyni zamanda Mülki Prosessual Məcəlləsinin 149-cu maddəsi ilə müəyyən olunmuş forma və məzmununa riayət etməyərək məhkəməyə təqdim etdiyindən, ərizə geri qaytarılmalıdır.

Məhkəmə izah edib ki, ərizənin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur.