Nazirlik 6 uşaqlı ailə ilə bağlı məlumat yaydı

Sosial şəbəkə səhifələrinin birində Sabunçu rayon sakini Mələk Həsənovanın maddi probleminin olması və həyat yoldaşı İsmayıl Həsənovun karantin səbəbilə iş tapmaqda çətinlik çəkməsi ilə bağlı yayılan məlumat Əmək və Əhalinin Sosial Müdafiəsi Nazirliyinin əməkdaşları tərəfindən yerində araşdırılıb.

Nazirliyin mətbuat xidmətinin rəhbəri Fazil Talıbov Publika.az-a bildirib ki, ona və həyat yoldaşına əmək müqaviləsi ilə haqqı ödənilən ictimai işlər barədə məlumat verilib və bu işlərə cəlb olunmaları təklif edilib.

İsmayıl Həsənov aktiv VÖEN istifadəçisidir və hazırda məşğul şəxs hesab edilir.

Mələk Həsənova isə ictimai işdə çalışmağa razılıq verib və Məşğulluq mərkəzinin əməkdaşları tərəfindən qeydiyyata alınıb. O, yaxın günlərdə əmək müqaviləsi əsasında bu işdə çalışacaq.

Həmçinin Mələk Həsənovaya 5-dən çox uşağı olan qadınlara hər uşağa görə 55 manat məbləğində aylıq müavinət təyin olunduğu, onun da 6 uşaqlı ailəsinə ümumilikdə 330 manat müavinət veriləcəyi bildirilib.

Eyni zamanda, ailənin hüququ yaransa da indiyədək müraciət etmədiyinə görə ödənməmiş həmin müavinətin qanunvericiliyə uyğun olaraq Mələk Həsənovanın ailəsinə tam ödənilməsi təmin olunacaq.

Ailəyə ünvanlı dövlət sosial yardımı almaq huququna baxılması üçün müraciət edə biləcəyi də bildirilib və bununla bağlı prosedur izah edilib.