Türkiyə Tell-Rifatda hava məkanına necə daxil olub? - Rusiya ilə razılaşma

"Türkiyə Hərbi Hava Qüvvələri Suriya və İraqda əməliyyatı Rusiya Federasiyası ilə əlaqələndirib. Rusiya tərəfi ilə müzakirələr aparılıb, fəaliyyətlərin koordinasiyası ilə bağlı daima təımas qurulub".

Publika.az “A HABER” telekanalına istinadla xəbər verir ki, bunu Türkiyə prezidentinin sözçüsü İbrahim Kalın deyib. O bildirib ki, Ankara Suriyanın şimalında və İraqda hava əməliyyatı zamanı Moskva ilə hərəkətlərini əlaqələndirib.

“Bu məsələlər bizim hava qüvvələri əməliyyatları ilə əlaqədar planlarımızla bağlı müzakirə olunur. Tell-Rifatda hava məkanına necə daxil olduq? Biz bunu Rusiya Federasiyası ilə müzakirə etdik, hərəkətlərimizi əlaqələndirdik. Planlaşdırırıq, müzakirə edirik, koordinasiya edirik, hərəkətə keçirik”, - deyə Kalın bildirib.

Noyabrın 20-dən Türkiyə Suriyanın şimalında qadağan olunmuş Kürdüstan Fəhlə Partiyasının (PKK) Suriya qanadına qarşı hava əməliyyatı keçirir - İraqın şimalında olduğu kimi Kobani şəhərinə də zərbələr endirilib. Türkiyə prezidenti Rəcəb Tayyib Ərdoğan əməliyyatı uğurlu adlandırıb və bundan sonra quru əməliyyatının keçiriləcəyini də istisna etməyib.

Ayşən Rəhim