FHN Sumqayıtda əlilliyi olan şəxslərə xidmət göstərənlər üçün tədbir keçirdi - FOTO

Fövqəladə Hallar Nazirliyinin Sumqayıt Regional Mərkəzi tərəfindən Əlilliyi olan şəxslər üçün sosial xidmət müəssisəsinin əməkdaşlarının iştirakı ilə “Fövqəladə hallarla bağlı davranış qaydaları” mövzusunda maarifləndirmə tədbiri keçirilib.

Bu barədə Publika.az-a qurumun Mətbuat xidmətindən məlumat verilib.

Bildirilib ki, tədbirin keçirilməsində məqsəd əlilliyi olan şəxslərin fövqəladə hallar zamanı mühafizə və təxliyəsinin təşkili, onlara qulluq edən şəxslərdə yanğın və digər təhlükələrlə bağlı zəruri davranış qaydalarının aşılanması olub.

Tədbirdə FHN-in Sumqayıt Regional Mərkəzinin, Dövlət Yanğın Nəzarəti Xidmətinin və Əlilliyi olan şəxslər üçün sosial xidmət müəssisəsinin əməkdaşları iştirak ediblər.

Tədbirdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğın və zəlzələ zamanı əlilliyi olan şəxslərin təhlükəsizliyinin təmin edilməsi ilə bağlı müvafiq davranış qaydaları barədə ətraflı məlumat verilib, FHN-in “112” qaynar telefon xəttinin təyinatı izah olunub, mövzu ətrafında geniş müzakirələr aparılıb və iştirakçıları maraqlandıran suallar cavablandırılıb.