Rusiyanı azərbaycanlı “Şişani” hədələyib - İŞİD-in qusarlı döyüşçüsü

Rusiyanı hədələyən İŞİD tərkibindəki qruplaşma azərbaycanlılardan ibarət dəstədir.

Publika.az xəbər verir ki, İŞİD-in çeçen camaatına yaxın saytları bununla bağlı məlumat yayıblar. Məlumatda deyilir ki, İŞİD-in “Qafqaz əmirliyi”nin əmiri Ömər Şişaninin adından Rusiyanı hədələyən bəyanatın yayılması doğru deyil: “Rusiyanı “cihad savaşı” ilə hədələyən əsas tərkibi azərbaycanlılardan ibarət olan Əbu Kamil camaatıdır. Onları çeçen camaatı ilə heç nə bağlamır. Bu camaatın tərkibində müxtəlif etnik qruplar, Şimali Qafqazdan gələnlər, keçmiş SSRİ məkanından olanlar daxildir. Say çoxluğu daha çox azərbaycanlılara aiddir. Camaatın lideri azəridir, lakin adı dəqiq bilinmir. O, özünü Ömər Şişani olaraq təqdim edir. Haqqında bilinən yeganə informasiya Azərbaycanın Şimal bölgəsindən, Qusardan olduğudur, lakin bəzən bu xəbərlər dolaşıq olur”.

Məlumatda qeyd edilir ki, Suriyada “Ömər Şişani” və “çeçen” adları markaya çevrilib.

“Mücahidlər özlərini Ömər Şişani adlandırmaqla daha mübariz olduqlarını düşünürlər. Bəzi çeçenlər Ömər Şişanini qəbul etmir və bəzən təhqir edə edirlər. Onların dilindən tez-tez “Ömər Gruzinetz” (gürcü dilində istehza, təhqir) sözünü eşitmək olar. Lakin onun liderliyini qəbul edib özünü “Şişani” adlandıranlar da çoxdur. Misal üçün, Ömər Şişaninin öz müavini Əbu Cihad özünü “Şişani Əbu Cihad” adlandırır. Sosial şəbəkələrdə, internet üzərində, xüsusilə “vkontakte” şəbəkəsində “Ömər Şişani” adında minlərlə hesab var. Mücahidlər qərbli jurnalistlərlə birmənalı şəkildə əlaqə saxlamırlar, onlar rus jurnalistlərinə üstünlük verərdilər, lakin ruslar da bunu qəbul etmir. Ona görə də şəxsi hesablarda məlumatlar daha çox rus dilində yayımlanır. Bundan da bir neçə qəzet xəbər düzəldib “Ömər Şişaninin strategiyası”, yaxud “Ömər Şişani təhdid etdi” kimi başlıqlarla yayırlar. Məhz sonuncu Rusiyanı təhdid də bu ad altında yayılıb, lakin əsl Ömər Şişaniyə aid deyil. Bu, yuxarıda qeyd etdiyimiz kimi, azərbaycanlı mübarizlərin çoxluq təşkil etdikləri Əbu Kamil camaatı tərəfindən edilib”, - deyə məlumatda bildirilir.

Yayılan məlumatda o da bildirilir ki, hazırda Kobanidə keçmiş SSRİ məkanından olan bir neçə camaat vuruşur: “Belə ki, “Dağıstan camaatı” kimi tanınan Sabri camaatı, çeçenlərin olduğu Adama və Axmada camaatı, qazaxların üstünlük təşkil etdikləri Daoud camaatı, özbəklərin Əbu Hanif camaatı və azərbaycanlılara aid Xattab camaatı. Bu camaatlar adətən etnik tərkibinə görə formalaşıb, lakin o da faktdır ki, hər bir camaatın tərkibində dominant etnik qrup olsa da, digər xalqlardan da təmsil olunanlar var. Misal üçün Daoud camaatı Qazax camaatı kimi tanınsa da, burda müxtəlif xalqların - qırğız, türkmən, noqay, ruslar, osetinlər, taciklər və digərləri də təmsil olunurlar. Bu camaatlar apardığı mübarizədə millətçiliyin əsas olmadığı fikrini irəli sürürlər, lakin bu məqam həmişə qorunmur”.

Qeyd edək ki, bu günlərdə yayılan xəbərlərə görə, İŞİD terrorçu qruplaşmasının liderlərindən biri Ömər əl-Şişani növbəti hədəflərinin Rusiya olacağını bəyan edib. O, atası Temur Batiraşvili ilə telefon danışığında deyib ki, yaxın vaxtlarda ruslara göstərəcəyik: “Ata, narahat olma, mən evə gələcəyəm və ruslara göstərəcəyəm. Mənimlə artıq minlərlə insan gələcək və onlar daha çox olacaq”.

Yayılan məlumat isə göstərir ki, Rusiyaya qarşı müharibə təhdidini İŞİD-in azərbaycanlı döyüşçülərinin olduğu Əbu Kamil camaatının “Ömər Şişani” ləqəbini götürmüş lideri edib.

Asif Nərimanlı