Gözəl və sağlam qaralmağın 5 qızıl qaydası

Dərinin daha yaxşı qaralması üçün onu günəşə hazırlamaq və sonra nəmləndirmək vacibdir.

Publika.az xəbər verir ki, bu sözləri gözəl və sağlam qaralmağın qaydalarından danışan kosmetoloq Zeynəb Mirzəyeva deyib. Sahənin mütəxəssisi dəriyə zərər vermədən günəş vannası qəbul etməyin yolları ilə yanaşı, fotoyaşlanmadan qaçmaq prinsiplərini də sadalayır.

“Birinci qayda: günəşdə UVB tipli ən təhlükəli ultrabənövşəyi şüalara qarşı qoruyucu kremdən istifadə etmək vacibdir. Mən 40 qoruma səviyyəsi olan məhsullardan istifadə etməyi tövsiyə edirəm. Dəri tonu tündləşdikcə, tədricən daha aşağı SPF-ə keçə bilərsiniz. Tünd dəriyə sahib olanlarsa SPF 30 olan məhsullardan başlaya və tədricən spf 8-10-a düşə bilərlər”, - Mirzəyeva deyib.

Bundan əlavə, dəri günəş vannası üçün hazırlanmalıdır. Dəridə melaninin yığılmasını asanlaşdırmaq üçün bədən skrabından istifadə edərək, onu çirklərdən və ölü hüceyrələrdən hərtərəfli təmizləməyə dəyər.

Üçüncü qayda: dərini yaxşı nəmləndirin, bunun üçün nəmləndirici kremlər və ya bədən südü uyğun gəlir”, - Mirzəyeva davam edib.

Mirzəyeva günəş vannasının müddətini tədricən artırmağı tövsiyə edir. “Birinci gün günəşin altında 20-30 dəqiqədən çox qalmamaq, sonra isə hər gün bu müddəti 5-10 dəqiqə artırmaq tövsiyə olunur. Burada hansı dəri tipinə sahib olduğunuzu nəzərə almaq lazımdır. Ağ dəri sahiblərinə həddindən artıq ehtiyatla günəş vannası qəbul etmək tövsiyə edilir, çünki dərinin piqmentasiyası və fotoyaşlanması ilə müşayiət olunan yanma riski çox yüksəkdir.

Günəş vannası üçün ən təhlükəli saatlar səhər 11-dən axşam 16-a qədərdir. Ən təhlükəsiz vaxt isə səhər və 16:00-dan sonradır”, - Mirzəyeva qeyd edib.

Sonda həkim su balansına nəzarət etməyi unutmamağı, dərinin qurumasının qarşısını almaq üçün kifayət qədər su içməyi tövsiyə edib.