Tramp eksklüziv gitara satacaq - Bu qiymətə

ABŞ prezident seçkilərində qalib gələn Donald Tramp seçki kampaniyasının şüarını daşıyacaq bir sıra eksklüziv “45” gitaranın satışını elan edib.

Publika.az xəbər verir ki, bu barədə seçilmiş prezident "Truth" sosial şəbəkəsindəki səhifəsində danışıb.

Onun sözlərinə görə, gitaralarda başlıqda mirvari boya ilə həkk olunmuş “Amerikanı yenidən möhtəşəm et” ifadəsi və Trampın son prezidentlik müddətini əks etdirən 45 rəqəmi var.

O qeyd edib ki, istehsal olunan 1,3 min nüsxədən yalnız 1275 ədədi satışa çıxarılacaq. Eyni zamanda, o, 275 alətə avtoqraf qoyub - onlardan 125-i artıq alıcıların ixtiyarındadır.

Gitaraların qiyməti min dollardan başlayır və Trampın şəxsi imzası olan gitara alıcılara 10-10,5 min dollara başa gələcək.

Xatırladaq ki, ABŞ-da prezident seçkiləri noyabrın 5-də keçirilib. Bu vəzifə üçün Demokratlar Partiyasının namizədi Kamala Harris və Respublikaçılar Partiyasının nümayəndəsi Donald Tramp mübarizə aparıb. Qələbə qazanmaq üçün siyasətçilərdən biri ən azı 270 seçici səsini toplamalı idi. Səsvermənin nəticələrinə görə, Tramp 312, Harris isə 226 səs toplayıb.

Adəm Abbaslı