Tramp Putinlə görüşmək üçün ŞƏRT QOYDU

ABŞ Prezidenti Donald Tramp Rusiya Prezidenti Vladimir Putinlə yenidən görüş keçirməyə hazır olduğunu bəyan edib. Lakin o, bunun yalnız mümkün razılaşma ilə bağlı tam əminlik əldə olunacağı təqdirdə baş verəcəyini vurğulayıb.

Publika.az xəbər verir ki, bunu ABŞ lideri Ağ Evdə jurnalistlərin Rusiya lideri ilə mümkün görüş barədə sualını cavablandırarkən bildirib.

“Biz hansı razılaşmanı bağlamaq istədiyimizi dəqiq bilməliyik”, – deyə Tramp qeyd edib.

ABŞ rəhbəri Ukraynada sülh prosesinin gedişindən narazılığını ifadə edib və Vladimir Putinlə “həmişə çox yaxşı münasibətləri” olduğunu qeyd edib.

Oktyabrın 22-də Tramp Budapeştdə Putinlə planlaşdırılan görüşün ləğv edildiyini açıqlayıb. O, bu görüşün gözlənilən nəticəni verməyəcəyini düşündüyünü bildirib. Bununla belə, gələcəkdə belə bir görüşün baş tutma ehtimalını istisna etməyib.

Ağ Evin rəhbəri həmçinin Ukrayna münaqişəsinin nizamlanması prosesinin “yetərincə yaxşı” getdiyini söyləyib və Rusiyadan cəbhə xətti boyunca atəşkəsə razılıq verməsini, mövcud mövqelərini qorumasını tələb edib.

Bu açıqlamalardan sonra ABŞ Rusiyaya qarşı yeni sanksiyalar tətbiq edib. Bu sanksiyalar Trampın prezidentliyinin ikinci dövründə ilk dəfə elan olunub.

Hüseyn İbadlı