Uitkoff sülhə nail olmağın əsas şərtini açıqladı

Rusiya və ABŞ hərbçiləri arasında yüksək səviyyəli dialoqun bərpası sülhə nail olmaq üçün həlledici əhəmiyyət kəsb edir.

Publika.az xəbər verir ki, bu barədə ABŞ pPezidentinin xüsusi elçisi Stiv Uitkoff Əbu-Dabidə keçirilən Rusiya, ABŞ və Ukraynanın üçtərəfli görüşlərinin yekunlarına dair "X" sosial şəbəkəsində məlumat paylaşıb.

"Birləşmiş Ştatlar və Rusiya, ABŞ-ın Avropa Komandanlığının rəhbəri general Aleksus Qrinkeviçin rəhbərliyi altında hərbi dialoq qurmaq barədə razılığa gəliblər. Münaqişə başlamazdan əvvəl dayandırılmış bu rabitə kanalı sülhə nail olmaq və onu qoruyub saxlamaq üçün kritik önəm daşıyır", - Uitkoff bildirib.

Qeyd edək ki, fevralın 4-5-də keçirilən üçtərəfli görüşdə yüksək rütbəli rəsmilər iştirak edib:

Rusiya nümayəndə heyətinə Baş Qərargahın Baş Kəşfiyyat İdarəsinin (QRU) rəisi İqor Kostyukov rəhbərlik edib.

ABŞ tərəfdən danışıqlarda xüsusi elçi Stiv Uitkoff və ABŞ Prezidentinin kürəkəni, iş adamı Cared Kuşner iştirak edib.

Ukraynanı isə Prezident Ofisinin rəhbəri Kirill Budanov, Milli Təhlükəsizlik və Müdafiə Şurasının katibi Rüstəm Ömərov və digər rəsmilər təmsil edib.

Hüseyn İbadlı