"Şahed"in Amerika versiyası: ABŞ İranı onun silahı ilə vuracaq

ABŞ Müdafiə Nazirliyi (Pentaqon) hərbi sənayedə böyük səs-küyə səbəb olacaq addım atmağa hazırlaşır. Birləşmiş Ştatlar İranın məşhur "Şahed" tipli dronlarının əsasında yaradılan "LUCAS" zərbə PUA-larının kütləvi istehsalına başlayır.

Publika.az xəbər verir ki, bu barədə ABŞ müdafiə nazirinin tədqiqat və mühəndislik üzrə müavini Emil Maykl "Bloomberg"ə açıqlamasında bildirib.

Onun sözlərinə görə, əsas məqsəd bu dronların ABŞ-da sürətli və kütləvi istehsalını təmin etməkdir. Pentaqon mütəxəssisləri hesab edir ki, bu texnologiya Birləşmiş Ştatlar ordusunun arsenalında "faydalı alətə" çevriləcək.

Agentliyin yaydığı digər sensasiyalı məlumata görə, bu sistemlərlə təchiz edilmiş bölmələr hələ İrana qarşı hərbi əməliyyatlar başlamazdan əvvəl Yaxın Şərqə göndərilib.

Qeyd edək ki, bir ədədinin qiyməti təxminən 55 min dollar olan bu dronlar, milyonlarla dollar dəyərindəki bahalı qanadlı raketləri qismən əvəz edəcək. "SpektreWorks" şirkəti tərəfindən hazırlanan "kamikadze" dronların uçuş məsafəsi 400 dəniz milini (təxminən 740 km) keçə bilir.

Adəm