Şəhid polkovnik-leytenantın xatirəsinə klip çəkildi - VİDEO

Şəhid polkovnik-leytenant Soltan Məmmədovun xatirəsinə ithaf olunmuş "Yuxunda görmüsən" adlı mahnıya çəkilən eyniadlı klipin təqdimatı baş tutub.

Publika.az xəbər verir ki, mahnını Xalq artisti Samir Cəfərov ifa edib.

Mahnının musiqisi Üzeyir Hacıbəyli adına Bakı Musiqi Akademiyasının professoru, sənətşünaslıq üzrə fəlsəfə doktoru Könül Hüseynovaya, sözləri isə Xalq şairi Vahid Əzizə məxsusdur.

Rejissorluğu Orxan Aliyə aid olan klipdə şəhid polkovnik-leytenant Soltan Məmmədov və onun xanımının obrazlarını Əməkdar artist Elnur Hüseynov və gənc müğənni Minayə Hüseynova canlandırıblar.

Klipin təqdimatı 21 iyul tarixində şəhid polkovnik-leytenantın şəhadətə qovuşduğu Tərtər rayonunun Suqovuşan qəsəbəsində “Təki Vətən Yaşasın” adlı tədbirdə keçirilib.

Qeyd edək ki, bu layihə Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin “Şuşa ili”ndə xüsusi qrant müsabiqəsi çərçivəsində maliyyə dəstəyi ilə “Zəfər” Şəhid Ailələrinə Dəstək İctimai Birliyi tərəfindən ərsəyə gəlib.