Afaq Bəşirqızı Mübariz Mənsimova MÜRACİƏT ETDİ

Xalq artisti Afaq Bəşirqızı azərbaycanlı iş adamı Mübariz Mənsimova müraciət ünvanlayıb.

Publika.az xəbər verir ki, aktrisa, Mənsimovun sahibi olduğu mərhum sənətkar Bəşir Səfəroğlunun adına bağışlanan gəminin şəhidlərə ithaf olunmasını istəyir:

“Gözəl insan, qeyrətli oğul, əsl azərbaycanlı Mübariz bəy, bu günlərdə Zümrüd xanımın - sizin ananızın müraciətini dinlədim. O qadına qarşı hörmətim birə-beş artdı. Zatən çox istəyirdim, çünki o, həyata və bizə sizin kimi oğul bəxş edib. Özünü cəmi iki dəfə görməyimə baxmayaraq, ona və sizə qarşı həddindən artıq hörmətim, sevgim, sədaqətim var. Sizin hədiyyə etdiyiniz gəmini şəhidlərə bağışlayıb. Çox mütəəssir oldum, alqışladım, sevinc göz yaşlarına boğuldum. Fikirləşdim ki, siz məhz belə ananın oğlu ola bilərsiniz.

Sizdən xahişim budur ki, atam Bəşir Səfəroğlunun adına verdiyiniz gəmini şəhidlərin adına bağışlayasız. Çünki Bəşir Səfəroğlu sənətkardır, əsl sənətkar əsrlərlə yaşayır. Amma əsl sənətkar eyni zamanda vətənini, torpağını sevən insandır. O da sağ olsa, mütləq belə bir addım atardı. Ona görə də çox xahiş edirəm, atam Bəşir Səfəroğlunun gəmisinin şəhidlərimizin adına bağışlanmasına icazə verəsiniz. Gəminin Birinci Qarabağ müharibəsində canından keçən oğullarımızın, indi-indi sümükləri torpağın altından çıxan naməlum şəhidlərimizin, İkinci Qarabağ müharibəsində şəhadətə ucalan igidlərimizin ümumi adına bağışlanmasını arzulayıram. Bilirəm, siz neçə vaxtdır şəhidlərimizlə, ailələrinin problemləri ilə maraqlanırsız, yaxınlarını qəbul etmisiz, onlarla danışmısız. İstərdim ki, bu elə bil ad olsun ki, mənim ürəyimdən tikanı millimetr qədər də olsa, çıxara bilsin. Bu da böyük şeydir. Çox sağ olun, minnətdaram, sizi çox istəyirəm, sizə böyük hörmətim var. Allah sizi qorusun, amin!”. (Pravda.az)