Avropa İttifaqından İrana ZƏRBƏ

Avropa İttifaq (Aİ) İran kəşfiyyatına qarşı sanksiyalar tətbiq etmək qərarı qəbul edib.

Publika.az xarici mediaaya istinadən xəbər verir ki, bu haqda Danimarkanın xarici işlər naziri Anders Samuelsen tvitter hesabından bildirib.

Onun sözlərinə görə, qərar İranın Avropadakı bəzi şəxslərə sui-qəsd planlaşdırması ilə bağlıdır.

“Avropanın xarici siyasəti üçün əhəmiyyətli bir gündür. Avropa İttifaqı Avropada həyata keçirdiyi sui-qəsdlər səbəbiylə İranın kəşfiyyat təşkilatına qarşı sanksiyaların tətbiqi mövzusunda razılaşdı. Bu, Avropa İttifaqından belə bir davranışı qəbul etməyəcəyimizə dair güclü bir siqnaldır”, - danimarkalı nazir qeyd edib.

Xatırladaq ki, ötən ilin oktyabrında Danimarka təhlükəsizlik gücləri İran kəşfiyyatı ilə əlaqəsinin olduğu bildirilən bir şəxsi “Ərəb Əhvaz Qurtuluş Hərəkatı”nın liderinə sui-qəsd planlaşdırmaqda ittiham edərək həbs etmişdi. İran Danimarkanın iddialarını rədd etmişdi.

Qeyd edək ki, Avropa İttifaqı ABŞ-ın İranla imzalanan nüvə sazişindən çıxmasından sonra bu ölkə ilə əməkdaşlığı davam etdirəcəyini açıqlamışdı.

Ömər