4 aylıq fövqəladə vəziyyət elan olundu, minlərlə insan küçədə qaldı

Yunanıstanın Midilli adasındakı “Moria” qaçqın düşərgəsində baş verən yanğın bölgəyə ciddi ziyan vurub.

Publika.az xəbər verir ki, bölgə sakinləri yerli mediaya düşərgədə sadəcə bir neçə çadırın salamat qaldığını açıqlayıb.

Səlahiyyətli şəxslər açıqlamalarında düşərgə sakinlərinin təhlükəsiz bölgələrə təxliyə olunduğunu bildirir. Lakin BBC-də yer alan məlumata görə, Midilli limanına getmək istəyən qaçqınların polis tərəfindən qarşısı alınır.

2 min 800 nəfərlik yerə sahib olan, lakin 12 min 500 nəfər qaçqına ev sahibliyi edən düşərgədəki yanğının səbəbi hələ də bilinmir.

Yunanıstanın ANA rəsmin xəbər agentliyinin iddiasına görə, COVID-19 testi pozitiv çıxan 35 nəfər ailələri ilə birlikdə izolyasiyaya alınmaq istəyib. Lakin onların bu təlləbi nəzərə alınmayıb. Yanğın da buna görə başladılıb.

Yaşanan fəlakətdən sonra Almaniya Avropa İttifaqına düşərgədəki qaçqınları qəbul etmək çağırışını səsləndirib.

Midillidə bu gündən etibarən 4 aylıq fövqəladə vəziyyət elan olunub.

Zümrüd