Deputatlara kolbasa hədiyyə etdilər - Amma qaytaracaqlar

Norveç parlamentinin (Stortinq) işinin xüsusiyyətlərinə görə deputatlar Milad bayramı münasibətilə “Kruse Larsen” PR agentliyinin onlara hədiyyə etdiyi kolbasanı geri qaytarmağa məcbur olublar.

Publika.az xəbər verir ki, bu barədə Norveçin “nrk.no” portalı məlumat yayıb.

Bildirilib ki, 70 deputata Milad təbrik kartı və “Smøla” kolbasası olan paketlər hədiyyə edilib.

“Kruse Larsen” kolbasaları şirkət işçilərinin tərtib etdiyi siyahıya əsasən göndərdiklərini açıqlayıb. Siyahıda bu il Norveçdən olan deputatlar da daxil olmaqla 600-dən çox ad olub.

PR agentliyinin sahibi Jan-Erik Larsen belə izah edib: “Biz kolbasaları istəyən hər kəsə veririk. Amma siyahının arxasında heç bir dərin fikir yoxdur. Biz bunu iki səbəbə görə edirik: Birincisi, zəhmətkeş vətəndaşlara Milad hədiyyəsi vermək gözəl olduğu üçün, ikincisi, biz yerli yeməkləri reklam edirik”.

Stortinqdəki siyasətçilər üçün sevinc qısamüddətli olub. Norveç parlamentinin qaydalarına görə, deputatlara hədiyyə olaraq yemək və içki qəbul etmək qadağandır.

“Rəhbərlik (Stortinq) bağlamaların içərisində qida olduğunu biləndən sonra hədiyyənin qəbulunu dayandırdı”, - Norveç Parlamentindən NRK-ya bildirilib.

Murad